Pandimi Covid-19 di Indunisia

Pandimi Covid-19 di Indunisia marupakan palihan matan pandimi panyakit koronavirus 2019 (Covid-19) nang rahatan balangsung sadunia. Panyakit ngini dimargakan ulih koronavirus sindrom pahinakan akut bangat 2 (SARS-CoV-2). Kajadian pusitip Covid-19 di Indunisia panambaian kali talacak wayah tanggal 2 Marit 2020, wayah dua urang dipastiakan tajangkit matan saikung warga nagara Japang. Wayah tanggal 9 April, pandimi sudah manyabar ka 34 parupinsi lawan DKI Jakarta, Jawa Barat, wan Jawa Tangah jadi parupinsi paling tajangkit SARS-CoV-2 di Indunisia. Sampai tanggal 3 Juli 2023, Indunisia sudah mangaduakan 6.812.127 kajadian pusitip mangganai paringkat panambaian pambanyaknya di Asia Tunggara. Dalam hal angka kamatian, Indunisia mangganai paringkat katalu pambanyaknya di Asia lawan 161.879 kamatian. Tagal, angka kamatian dikikiraakan jauh labih tinggi matan data nang dikaduakan marga kada dihitungnya kajadian kamatian lawan gajala Covid-19 akut nang balum dipastiakan atawa ditarai. Samantara ngitu, dipadahakan 6.642.003 urang sudah wigas, manyisaakan 8.245 kajadian nang rahatan diharagu. Pamarintah Indunisia sudah manarai 76.062.770 urang matan jumlah 269 juta panggana, nang baarti wastu kikira 281.501 urang par sajuta panggana.Citakan:Wikidata Sawagai tanggapan tahadap pandimi, sapalih wilayah sudah mambalakuakan pawatasan susial basakala basar (PSBB) wayah tahun 2020. Kabijakan ngini diganti lawan pambalakuan pawatasan kagiatan masarakat (PPKM) wayah tahun 2021. Wayah 13 Januari 2021, Parisidin Joko Widodo manarima paksin Covid-19 di Istana Negara, sakaligus manandai mulanya parugram pamaksinan Covid-19 di Indunisia.